Kloompenuujts….

Jao beste Vastenaovend vierders es geer neet nao de Kloompezitting zeet gewaes, dan höb geer niks gemis.
Waardeloos waor ut allemaol. Dat heit niks mjeh mit carnaval te maake.
Oprechte excuses aan ut adres van ut kasteleins echtpaar zeen dan auch op zien plaats.
Veer höbbe de aafgeloupe week noch mjeh averei opgeloupe. Un TV optreje bie L1 bleek oonwaardig um oet te zende.
Gelökkig kreege veer hie en dao nog get bieval want andersj waore veer d’r geliek mit gesjtop.
Dat euverwege veer noe toch weer serieus naodat veer aafgeloupe zaoterdig mit 15 man nao Venlo zeen gereeje veur un optreje bie de Naate Raaf in un te klein 9 persoons böske mit alle atribute neeve, op en oonder oos. Wat un ellende. De zitting waor euveriges perfek.

Daonao dezelfde weeg oonder sjlechter umsjtendigheje weer trök nao Heerlen.
Dao waore veer de verrassingsact in de Tante Annie Power Sjunkel Party van Ummer d’r Neever in ut Theater in Heerlen.
Un verrassing woort ut werkelik. Veer houwe dao zwah nao oetgekeke en völ van verwach.
Noe bleek dat veer veur unne zaal mit dooje winkbuile mooste optreje. Dao waore d’r al gans get dwad gegange veur veer kaome want in unne zaal veur 800 man waore noch wagoet 350 luuj aanwezig. Waarsjienlik teleurgesjtild dat de koffietaofel neet doorging. Wat un graafstjtumming um 12 oor saoves. Veer höbbe d’r alles aangedoon um d’r un paar levend te maake.  Frank heit nog eemes gereanimeerd wahvan heer voong dat heer sjleg oetzaog méh dat bleek later de greuncontainer te zeen.
Animere lökde neet, re-animere lökde neet, toen höbbe veer mer nao oos letste hölpmiddel gezeuk en dat waor oos wiegeleedsje “Zuuver opgelag”. Wie veer op de jerste riej eemes zaoge opsjtoon um mit te doon, höbbe veer van entoesjasme de veire oet de kösses gerete. Later bleek dat dei minsj dei opsjtoong moos sjiete. Wie heer trök kaom hauwe ze oos al van de bühn geblooze, zoonder applaus, zoonder bedankje, zoonder gage. Met oprechte deelneming.
Wie veer nao völ vieve en zesse weer allemaol in ut völ te klein böske waore geduut, kaom oos nog de theater manager vraoge wéh die veire op de bühn kaom opruime. Heerle alaaf.
De mismood zit noe good drin bie de Kloomp.
Goon veer nog get doon? Veer goon ut in eeder geval probere.
Dinsdig geit un delegatie mit de Oprechte Leugenair Toer mit. Woonsdig geit un delegatie nao de Rote Funke in Kölle.
Vriedig kingeroptoch in Meersje en SV.
Carnavalsmaondig: Blauwe maondig optochzitting op de hook van de Sjtasiesjtraot en Bungersjtraot vanaaf 11 oor mit alle grwatte name van de Limburgse Vastelaovend.
Carnavalsdinsdig: TOP 111.
Maak sjpas en plezeer en beleif ut in Meersje.
Vastelaovend saame en geneet d’r van.
Nieuwe leden voor de Kloomp kunnen zich opgeven bij Jo Geraerds aan de pletsmolen. Mogen niet in Heerlen geboren zijn.

No Comments Yet

Leave a Reply

Your email address will not be published. Required fields are marked *

FireStats icon Powered by FireStats